Почнаа археолошките истражувања во Стоби

July 6, 2020, 2:19 am

≫ Next: Промоција на четири изданија за македонскиот јазик во МАНУ

≪ Previous: Почнува „Скопско лето“ со ограничен број посетители и со мерки за заштита

Поради пандемијата со задоцнување од три месеци, НУ „Стоби“ на 1 јули почна со програмските активности од годинашните археолошки истражувања на локалитетот Стоби. Ќе се доистражува Римската порта и југоисточниот сегмент од комплексот градби околу храмот на Изида, а ќе има конзервација и доистражувања на Римскиот театар во Стоби. Директорот на НУ „Стоби“ Спасе Перовски за МИА изјави дека станува збор за проекти одобрени во програмата за 2020 на Министерството за култура. Се работи проектот „Изработка на проект за конзервација на археолошките остатоци од Римската порта и сегмент од југоисточен бедем“. Истовремено има и археолошки доистражувања на Римската порта и југоисточниот сегмент од комплексот градби околу храмот на Изида“, а проектот го раководи археологот Јован Радњански. –Интересно е што таму досега никогаш не било ископувано и затоа очекуваме интересни наоди и научни заклучоци во врска со функционирањето на градот, најави Перовски. Вторите истажувања се „Конзервација, реставрација, реконстукција и археолошки доистражувања на објектот Римски театар во Стоби“, а проектот го раководи археологот Гоце Павловски. Перовски најави дека потоа ќе работат на сцената на театарот, а ќе се прави и нова рампа за влез на товарни возила во близина на сцената и од каде директно се слегува во делот на театарот. Директорот на НУ „Стоби“ планира сите програмски активности предвидени за годинава во Стоби и поддржани од Министерството за култура во рамки на матичните дејности во целост да бидат реализирани до крајот на годинава. Тој информира дека поради кризата предизвикана од Ковид-19, НУ Стоби донела одлука да врати во државниот буџет 980 илјади денари, пари кои им беа доделени од Министерството за култура за два проекта – „Ретроспективна изложба на Петар Хаџи Бошков“ во визуелни уметности архитектура и дизајн за која беше доделен буџет од 800 илјади денари и „Римскиот театар во Стоби: Студија за кавеата 2000-2019. Едиција: Студии за старините на Стоби, серија монографии книга II“, Гоце Павловски, во издавачка дејност, 180 илјади денари. -Заинтересираноста на луѓето за Стоби, посветената работа, духот на тимот вработени и времено ангажирани, дава за право сите ние да се увериме дека поседуваме локалитет кој е рамо до рамо со светските археолошки локалитети, паркови и музеи од оваа област, потенцира Перовски. Додаде дека Националната установа за управување со Археолошкиот локалитет Стоби ниту во време на кризата поради вирусот не престанала со активности за популаризација и презентација на Стоби. Перовски потенцира дека во овие услови посебно била активна веб-платформата и социјалните мрежи и дека интересот бил уште поголем. Доказ за тоа, рече, е што нивните постови за разни ископини и предмети од Стоби имале повеќе илјади прегледи. Интересно е што еден од тие постови за само еден ден имал 16 илјади прегледи. Станува збор за пост на 3 јули со кој беше соопштено дека локалитетот се отвора за посетителите.

↧

Промоција на четири изданија за македонскиот јазик во МАНУ

July 6, 2020, 3:07 am

≫ Next: „Охридско лето“: Славниот Мориконе ја круниса уметничката вредност на нашиот фестивал, вечно му благодариме

≪ Previous: Почнаа археолошките истражувања во Стоби

Четири капитални изданија за македонскиот јазик утре ќе бидат промовирани на платото пред МАНУ. Делата деновиве излегоа од печат на иницијатива на Македонската академија на науките и уметностите (МАНУ) и со целосна поддршка и вклученост на Институтот за македонски јазик „Крсте Мисирков“, Филолошкиот факултет „Блаже Конески“ и Советот за македонски јазик. Се работи за „Македонскиот јазик – континуитет во простор и време“, колективна монографија во којашто е даден синтетски преглед на историскиот развој на македонскиот јазик од IX век, па сè до неговата кодификација. Останатите дела се „Погледи за македонскиот јазик“, меѓународен зборник на трудови во којшто над 40 странски и македонски лингвисти имаат свои прилози за различни аспекти на македонскиот јазик, „Македонска хрестоматија“, избор на позначајни македонски текстови од IX до XX век и „Лингвистички атлас на македонските дијалекти (според материјалите на ОЛА)“, кој дава продлабочен увид во лексичкото богатство на македонските дијалекти. Сите овие дела се поставени и во дигитална форма на главната страница на МАНУ. На промоцијата, воведна реч ќе има претседателот на МАНУ, академик Љупчо Коцарев, а книгите ќе ги промовираат академик Катица Ќулавкова, проф. д-р Снежана Велковска, проф. д-р Димитар Пандев и дописниот член Марјан Марковиќ. – Со излегувањето на овие значајни изданија за македонскиот јазик, а и со заедничката промоција, македонската лингвистичка средина се обединува за да даде вистински аргументирани и научни одговори за континуитетот и еволуцијата на македонскиот јазик, а и за неговото место во меѓународната славистика и лингвистика, информираат од МАНУ.

↧

„Охридско лето“: Славниот Мориконе ја круниса уметничката вредност на нашиот фестивал, вечно му благодариме

July 6, 2020, 4:40 am

≫ Next: Во тек конкурсот за наградата „Антево перо“

≪ Previous: Промоција на четири изданија за македонскиот јазик во МАНУ

Незаборавното музичко доживување на Енио Мориконе, со чиј настап на Античкиот театар во Охрид беше отворено 49. „Охридско лето“, ја круниса уметничката вредност на историјата на фестивалот. Вистинските уметнички вредности оставаат вечни траги кои ќе се паметат и по смртта. Огромна и вечна ќе биде благодарноста за придонесот на големото композиторско име, оскаровецот Енио Мориконе, во развојот и афирмацијата на оваа врвна светска културна манифестација, соопшти фестивалот „Охридско лето“ откако беше објавено дека денеска почина италијанскиот и светски познат композитор и диригент. Дирекцијата на нашата најголема музичко-сценска манифестација соопшти дека Античкиот театар беше претесен за сите што сакаа да уживаат во настапот на Мориконе пред 11 години кога, како што наведува во соопштението, „по секоја музичка целина следуваа гласни аплаузи и овации од гледачите што од почит кон композиторот застануваа на нозе и бараа уште музика“. Од сцената на Античкиот театар, додава Дирекцијата на фестивалот, „маестрално прозвучија 20-те филмски музички теми кои оскаровецот Мориконе ги создал во својата долга и богата композиторска кариера“. – Искрено жалиме што заминува уште еден голем уметник, кој со неговите дела остави неизбришливи траги во историјата на „Охридско лето“. Како диригент со повеќе од двесте уметници, хорот на Македонската опера и балет и филхармонискиот оркестар „Гјор“ од Унгарија, неговиот неповторлив настап на свеченото отворање во 2009 година се врежа во меморијата на бројни љубители на уметноста кои и ден-денес се присетуваат на двочасовната филмска приказна, во која имаше композиции од повеќе легендарни филмови како: „Добриот, лошиот и грдиот“, „Беше еднаш на Дивиот запад“, „Недопирливите“, „Мисија“, „Сицилијанскиот клан“, „Една ноќ на вечера“, „Грст динамит“, „Битката кај Алжир“, „Истрага на граѓанин под сомнение“, „Така тврди Перира“, „Работничката класа оди во рајот“… Музички совршениот Мориконе ќе остане запаметен како уметник кој на повеќеилјадната публика и приреди концерт кој нема да се повтори токму како и самиот негов наслов „Беше еднаш во Македонија“, настан што е реткост и претставува вистинско доживување да се биде дел од него, пишува во соопштението на „Охридско лето“. Во него се додава и дека славниот композитор бил одушевен од Охрид и Античкиот театар и од можноста неговиот концерт да се одржи на тој простор. – Избегнувам да давам премногу комплименти, но ова е еден посебен град, посебно место и тоа сакам да го нагласам во оваа прилика. Голема чест ми е што јас ќе го отворам фестивалот „Охридско лето“, кажа Мориконе при престојот во нашата земја во 2009 година, кога доби и Медал за заслуги за Македонија. Оскаровецот Енио Мориконе почина на 91 година. Според италијанската новинска агенција АНСА, Мориконе починал во клиника во Рим како последица на пад минатата недела, кога скршил бутна коска. Во својата плодна кариера тој создаде музиката за повеќе од 500 филмови и за некои од најзначајните режисери на 20 век, како: Бертолучи, Серџо Леоне, Пазолиини, Оливер Стоун, Алмодовар, Брајан Де Палма, Бери Левинсон, Терек Малик и многу други. Енио Мориконе е роден во Рим на 10 ноември 1928 година. Познат е по своите бројни филмски музички теми, од кои 30 напишал за вестерн филмови, по кои ќе стане препознатлив. Неговиот карактеристичен и мошне имитиран стил на компонирање за овој жанр на филмови може да се долови преку музиката за филмот „Добриот, лошиот и грдиот“ на режисерот Серџо Леоне со кого Енио Мориконе имал долга и плодна соработка. (МИА)

↧

Во тек конкурсот за наградата „Антево перо“

July 6, 2020, 8:40 am

≫ Next: Промоција на четири изданија за македонскиот јазик

≪ Previous: „Охридско лето“: Славниот Мориконе ја круниса уметничката вредност на нашиот фестивал, вечно му благодариме

Меѓународната поетско културна манифестација „Анте Поповски – Антево перо“, потсетува дека е во тек Конкурсот за доделување на наградата „Антево перо“ за 2020 година. Наградата се доделува како исклучително поетско признание за необјавена збирка песни на македонски јазик, а е востановена во чест на современиот македонски поет, академик Анте Поповски. Основната мисија на оваа награда е популаризација на поетскиот книжевен жанр, поттикнување на младите поети кои творат и се остваруваат на македонски јазик и афирмација и популаризација на нивните дела. Годинашниот конкурс досега привлече голем број на творци кои го посакуваат признанието што го носи името на великанот на македонската поетска мисла, Анте Поповски. Меѓу оние кои доставиле свои стихозборки, има автори што одамна ја имаат потврдено својата книжевна вредност, авторитет и квалитет и кои многупати биле наградувани или се закитиле со некое еснафско признание, но и талентирани поетски пера, чие што време допрва надоаѓа. Организаторите велат дека меѓу пристигнатите поетски ракописи има и неколку книги од млади автори, кои со оглед на годините освен за наградата „Антево перо“имаат привилегија да бидат во конкуренција и за наградата „Антев часовник“, востановена лани за поети до 25 години, со цел дополнително да се стимулира творештвото на најмладите наши таленти. Творците кои во наредниот период имаат намера да учествуваат на Конкурсот за наградата „Антево перо“ своите ракописи можат да ги испратат на email адресата: antevopero@gmail.com заклучно со 25-ти август, а за детали околу конкурсните пропозиции и рокови можат да се информираат на фејсбук страницата Антево перо

↧

Промоција на четири изданија за македонскиот јазик

July 6, 2020, 10:21 pm

≫ Next: 15. АКТО Фестивал за современи уметности продолжува во Домот на култура во населба Ченто

≪ Previous: Во тек конкурсот за наградата „Антево перо“

Промоција на четири капитални изданија за македонскиот јазик ќе се одржи денеска на платото пред Македонската академија на науките и уметностите (МАНУ). – На иницијатива на Македонската академија на науките и уметностите и со целосна поддршка и вклученост на Институтот за македонски јазик „Крсте Мисирков“, Филолошкиот факултет „Блаже Конески“ и Советот за македонски јазик, деновиве од печат излегоа делата: „Македонскиот јазик – континуитет во простор и време“, колективна монографија во којашто што е даден синтетски преглед на историскиот развој на македонскиот јазик од IX век па сè до неговата кодификација; „Погледи за македонскиот јазик“, меѓународен зборник на трудови во којшто над 40 странски и македонски лингвисти имаат свои прилози за различни аспекти на македонскиот јазик; „Македонска хрестоматија“, избор на позначајни македонски текстови од IX до XX век; и „Лингвистички атлас на македонските дијалекти (според материјалите на ОЛА)“ кој дава продлабочен увид во лексичкото богатство на македонските дијалекти, се вели во соопштението од МАНУ. Сите овие дела се поставени и во дигитална форма на главната страница на МАНУ. Воведно обраќање ќе има претседателот на МАНУ Љупчо Коцарев, а книгите ќе ги промовираат Катица Ќулавкова, Снежана Велковска, Димитар Пандев и Марјан Марковиќ. – Со излегувањето на овие значајни изданија за македонскиот јазик, а и со заедничката промоција, македонската лингвистичка средина се обединува за да даде вистински аргументирани и научни одговори за континуитетот и еволуцијата на македонскиот јазик, а и за неговото место во меѓународната славистика и лингвистика, наведуваат од МАНУ.

↧

15. АКТО Фестивал за современи уметности продолжува во Домот на култура во населба Ченто

July 7, 2020, 2:12 am

≫ Next: Во МАНУ промовирани четири капитални дела за македонскиот јазик

≪ Previous: Промоција на четири изданија за македонскиот јазик

Со изработка на мурал на фасадата на Домот на култура во населбата Ченто во Скопје продолжува програмата на јубилејното, 15-то издание на АКТО фестивалот за современи уметности, во продукција на организацијата Факултет за работи што не се учат (ФР~У). Автор на муралот е младиот уметник Владимир Милиќ, и е во продукција на ФР~У во партнерство со организацијата Културно Ехо, Општина Гази Баба и Град Скопје. После минатонеделното отварање на 15-тиот АКТО со муралот во Битола на колективот КУРС од Белград, АКТО продолжува со интервенции во други градови низ државата во соработка со локалните заедници и различни партнери. – Идејата за мурал во Ченто е во правец на соработка и активирање на оваа локална заедница во продукција на културни настани за заедницата, но и во насока на зачувување и ставање во функција на домот на култура во населбата. Муралот пак е развиен како неколкумесечен процес на работа на уметникот Владимир Милиќ од Ченто со пошироката локална заедница и се однесува на потенцирање на важноста на солидарноста особено во овој дел од населбата, информираат организаторите на АКТО. Иницијативата за овој мурал се однесува на две линии на значења: едното е обновување и повторно ставање во функција на бетонскиот културен дом во Ченто и со тоа реобмислување на модернистичкото незаштитено културно наследство на Скопје, а вториот е потенцирањето на важноста на солидарноста на заедницата за време на поплавите на подрачје на општина Гази Баба кои се случија пред четири години. – Да не се заборави поплавата која ја зафати нашата општина, елементарна непогода која не бираше нација, вера и политичка определба, а токму во тие моменти се покажа колку можеме да бидеме солидарни и да си помогнеме едни со други. Општина Гази Баба е мултиетничка средина, место каде што сите ние делуваме секојдневно и затоа мораме да ги почитуваме различностите и да си помагаме еден со друг, велат од Општина Гази Баба. Овој мурал е дел од серијата на мурали кои деновиве се изработуваат во уште пет други градови во земјава и тоа во Штип, Прилеп, Велес, Кочани и Гевгелија, а веќе се заврши муралот во Битола кој за жал беше нагрден со пораки на говор на омраза само неколку часа подоцна . Автори на муралите се: Јана Јакимовска, Миле Ничевски, Ненад Тонкин, Ристо Аврамовски, Филип Јовановски, Владимир Милиќ и Давор Кешкец и се реализираат во соработка со Гласен текстилец, Штип; БОШ Фестивал, Гевгелија; Културно ехо, Скопје; Центар за современи ликовни уметности ЦСЛУ-Прилеп и Јавен Простор – Прилеп; Народен Театар Битола; Дом на Култура Ченто; Општина Гази Баба; Општина Велес, Општина Кочани и Дом на Култура Бели Мугри – Кочани. Овој зафат, кој се протега на површина од околу 600 метри квадратни и тоа паралелно во седум градови е концепт, кураторство и организација на Филип Јовановски, извршен продуцент е Ненад Тонкин, а во продукцијата се вклучени и Марија Стојанова, Кристијан Караџовски, Денис Ампев, Александар Јовановски и Ивана Васева. – Иницијативата за исцртување на мурали на јавни простори има за цел на креативен начин да зборува за одредени теми кои покренуваат и мобилизираат не само поединци туку цели групи и заедници кон активирање и работење на заедништвото и заедничкото во градење на едно праведно општество. А токму заедништвото и заедничкото, како и културата на солидарноста, се покажаа како најургентни прашања кон кои треба сите да се фоскурираме во време на пандемијата со корона вирусот. Покрај тоа, оваа програма критички ги адресира, преиспитува и истражува прашањата поврзани со модерното визуелно и архитектонско наследство, нејзината естетика како и нивните последици во денешниот свет. Таа се манифестира преку креативни формати на акција – мурали, произведени преку активен дијалог и соработка помеѓу културните работници и организации во секоја локална заедница поединечно, велат од АКТО. Во општество, посочуваат од АКТО, каде ксенофобијата, национализмот и дискриминацијата по сите основи е се уште присутна, се поставува прашањето како и на кој начин културата треба да ги активира граѓаните да зборуваат гласно наспроти овие теми? АКТО во време на пандемијата на корона го окупира јавниот простор и адресира пораки кои треба да мобилизираат и еманципираат во насока која ќе пркоси на националистичките и авторитарни тенденции кои сеуште постојат во јавниот дискурс и кои го спречуваат развојот на општеството, ги загрозуваат правата и слободите на граѓаните. АКТО зборува за солидарноста која културата треба да ја иницира и поттикне во локалните заедници со цел создавање на праведно општество. АКТО зборува за важноста на културата и уметноста и за правата на уметницте и културните работници! Организаторите информираат дека покрај муралите годинешната програма на јубилејното, 15-то издание на АКТО ќе вклучува и други содржини кои ќе се објават дополнително. Годинава АКТО потсетува на вредностите за кои сите овие изминати години се бори и ги промовира како анти-национализмот, антифашизмот, антидискриминација, почитување на различностите, почитување на соседите, солидарноста, помагањето на послабите, слободата и критичката мисла, против насилството и родовата рамноправност. За авторите на муралот во Ченто: Владимир Милиќ роден 1985 година во Скопје. Апсолвент на академијата за ликовни уметности ФЛУ во Скопје, смер графика. Работи како дизајнер, илустратор и муралист. Член е на колективот ЕБСФ. Културнo ехо е меѓународна, невладина и независна организација со седиште во Скопје, Р. Македонија. Здружението се формира по слободна иницијатива на група млади ентузијасти. АКТО Фестивал за современи уметности – ФР~У започна да го организира фестивалот АКТО во 2006 година во Битола, по што АКТО се разви во отпорна, силна и контекстуална платформа за промоција и креирање на интердисциплинарни критички програми и концепти. АКТО е фестивал на современи уметности кој се обидува да ги отвори не само темите кои се важни за моменталната социјално- политичка и уметничка реалност, туку и да стимулира формати на продукција кои ќе ја ‘размрдаат’ состојбата на status quo. Фестивалот се одржува секој август, во Битола, и претставува паралелен настан со субвертирачка и еманципирачка мисија кон настаните кои се организирани од страна на локалните општини и културните институции. Во 2016 и 2017 година, поради разгорените локални проблеми и потреби, АКТО се ребрендираше во ПОП АП АКТО, привремен концепт за креирање на фестивалот во другите градови во Македонија. Покрај Битола, АКТО досега се организирал во Скопје, Тетово, Штип и Кочани. (MИА)

↧

Во МАНУ промовирани четири капитални дела за македонскиот јазик

July 7, 2020, 6:00 am

≫ Next: Европски филмови во дворот на Кинотека во четири вечери

≪ Previous: 15. АКТО Фестивал за современи уметности продолжува во Домот на култура во населба Ченто

Да се дадат вистински аргументирани и научни одговори за континуитетот и еволуцијата на македонскиот јазик и за неговото место во меѓународната славистика и лингвистика е целта на четирите капитални изданија за македонскиот јазик, кои денеска беа промовирани на платото пред Македонската академија на науките и уметностите. Станува збор за дела кои на иницијатива на Македонската академија на науките и уметностите и со целосна поддршка и вклученост на Институтот за македонски јазик „Крсте Мисирков“, Филолошкиот факултет „Блаже Конески“ и Советот за македонски јазик, изелгоа деновиве од печат: „Македонскиот јазик – континуитет во простор и време“, колективна монографија во којашто е даден синтетски преглед на историскиот развој на македонскиот јазик од IX век па сè до неговата кодификација; „Погледи за македонскиот јазик“, меѓународен зборник на трудови во којшто над 40 странски и македонски лингвисти имаат свои прилози за различни аспекти на македонскиот јазик; „Македонска хрестоматија“, избор на позначајни македонски текстови од IX до XX век; и „Лингвистички атлас на македонските дијалекти (според материјалите на ОЛА)“ кој дава продлабочен увид во лексичкото богатство на македонските дијалекти. Претседателот на МАНУ академик Љупчо Коцарев истакна дека овие изданија и светската лингивистичка наука потврдуваат дека тн. спор, македонско – бугарски јазичен спор, всушност не е спор, туку апсурд. -Зарем е можно во 21 век да се оспоруваат основни човекови права. При прогласувањето на македонскиот јазик за вештачки Бугарската академија на науки се потпира на две бесмислени тврдења, сличноста со бугарскиот јазик и политичкиот карактер на македонскиот јазик, вели Коцарев. Според академик Катица Ќулавкова, самото објавување и подготовка на овие четири тома делумно е предизвикано од потребата да дадеме конкретен научен одговор на некои ставови кои отстапуваат од научната вистина по однос на потеклото и развојот на македонскиот јазик , а второ некои од нив на пример како лингвистичкиот атлас се производ на долгогодишна работа во рамки на меѓународните институции. Проф. др. Марјан Марковиќ дописен член на МАНУ во обраќањето изрази уверување дека објавените научни факти за македонскиот јазик ќе ги прифати и политиката и политичарите и ќе ги имаат предвид при соочување со идните предизвици. – Како што успеавме ние да се обединиме и да ги покажеме сите аргументи и научни факти поврзани со македонскиот јазик не само во рамките на нашата земја, туку и во меѓународните проучувања и добивме потврда и од меѓународната научна средина, верувам дека и политиката и политичките чинители ќе ги прифатат тие факти, ќе ги ставаат секогаш пред себе во сите премрежја што не очекуваат и во иднина, според кого моќта за адаптација на македонскиот јазик е токму клучот за неговиот долговековен континуитет. Сите четири промовирани дела се поставени и во дигитална форма на главната страница на МАНУ. МАНУ на 3 декември 2019 година усвои Повелба за македонскиот јазик во која ги изнесува научно признатите факти за македонскиот јазик, како и улогата на Академијата во проучувањето и афирмацијата на македонскиот јазик во домашни и во меѓународни рамки. Повелбата, како што соопшти МАНУ, ги зацврстува ставовите на Академијата за потребата од засилена и континуирана поддршка на научните истражувања на македонскиот јазик и македонските дијалекти, водејќи се од строго научни начела. Бугарската академија на науките на 11 декември, лани, излезе со став дека македонскиот јазик не постои и оти тој е „писмено-регионална норма“ на бугарскиот јазик. (МИА)

↧

Европски филмови во дворот на Кинотека во четири вечери

July 9, 2020, 10:22 pm

≫ Next: „Ерос и Танатос“ – самостојна изложба на Весна Ничевска во МКЦ

≪ Previous: Во МАНУ промовирани четири капитални дела за македонскиот јазик

Четири современи европски филмови ќе прикаже Кинотеката на отворено од денеска до 13 јули. Четиридневната летна кинопрограма ќе се емитува во дворот на Кинотеката. Ќе почне вечер од 21 часот со проекција на филмот „Господ постои, името ѝ е Петрунија“ во режија на Теона Стругар Митевска, кој ја доби престижната награда „Лукс“ (LUX Prize) за најдобар европски филм за 2019 година. Утревечер (11 јули) ќе биде прикажана комедијата „Гостин“ – копродукција на Италија, Швајцарија и Франција, на 12 јули – австриската драма „Земјата под моите нозе“, а на 13 јули – швајцарско-италијанската романса „Сонот на Катрина“. Почетокот на проекциите е во 21 часот, а цената на влезниците е 100 денари. Целата програма со повеќе информации за филмовите е објавена на официјалната фејсбук-страница на настанот. Општина Карпош, која е меѓу коорганизаторите на летната кинопрограма, ги информира жителите од зградите околу Кинотеката дека ќе биде изгаснато уличното осветлување на дел од улицата „Никола Русински“ за време на кинопроекциите. Посетителите ќе треба да се придржуваат до препораките за заштита од КОВИД19: носење заштитна маска, физичко растојание за време на проекцијата, задолжителна дезинфикација на рацете при влез во дворот и објектот на Кинотеката. Забрането е внесување пијалаци. – Првиот викенд ќе го одбележи „Европскиот филмски предизвик“ (European Film Challenge) – иновативна дигитална платформа која ја промовира европската кинематографија. Секој од посетителите на овој настан може да биде дел од предизвикот со регистрација на https://europeanfilmchallenge.eu/ каде на својот профил може да ги забележи гледаните филмови, но и да сподели моменти (фотографија, видео) на социјалните мрежи користејќи го хаштагот #EuropeanFilmChallenge, соопшти Општина Карпош.

↧

„Ерос и Танатос“ – самостојна изложба на Весна Ничевска во МКЦ

July 10, 2020, 1:01 am

≫ Next: Циклус филмови со Чарли Чаплин под отворено небо во Кинотека

≪ Previous: Европски филмови во дворот на Кинотека во четири вечери

Во Галеријата на Младинскиот културен центар вечер од 20 часот ќе биде отворена изложбата „Ерос и Танатос“ на Весна Ничевска, на која академската сликарка ќе се претстави со 40-ина дела. Тие имаат фигуративна, но и експресивна содржина и се изработени во различни техники: туш, акварел, акрилик, пастел и комбинирана техника. – Сензуалноста, еротиката и љубовта наспроти смртта и страста за живот инкорпорирани во сцени замрзнати во времето, а сепак толку живи претставени со брзи и експресивни, спонтани потези на хартија или платно…, наведува МКЦ за самостојната изложба „Ерос и Танатос“ која ќе може да се посети до 20 јули. МКЦ информира дека настанот ќе биде реализиран по соодветниот протокол и со почитување на препорачаните мерки за заштита од вирусот КОВИД-19. Авторката на изложбата Весна Ничевска (1977, Скопје) дипломирала во 2001 година на Факултетот за ликовни уметности во Скопје, во класата на проф. Родољуб Анастасов. Учествувала на повеќе групни изложби, стрип-фестивали, нејзини дела се објавувани во повеќе стрип-ревии и илустрирала голем број приказни за деца. (MИА)

↧

Циклус филмови со Чарли Чаплин под отворено небо во Кинотека

July 13, 2020, 7:00 am

≫ Next: Промоција на книгата „Песните се нивни незаборав“

≪ Previous: „Ерос и Танатос“ – самостојна изложба на Весна Ничевска во МКЦ

Од петок – 17 јули од 21 часот Кинотека ќе почне со прикажување на филмови на Чарли Чаплин, и тоа во летното кино под отворено небо. Како што соопшти денеска Кинотека, станува збор за десет наслови во овој исклучителен циклус – што го опфаќа творештвото на Чаплин од неговите почетоци, па сè до последните дела. Кинотека, исто така, овозможува увид во најдоброто од златната ера на немиот филм, но и начинот со кој Шарло се справува со предизвикот на звучниот филм. – В петок, 17 јули ќе биде прикажан филмот „Циркусот’, в сабота, 18 јули – „Светлините на Велеградот“, в понеделник, 20 јули – „Големиот диктатор“, во вторник 21 јули – „Господин Верду“, во среда 22 јули – „Крал во Њујорк“, во четврток 23 јули – „Светлините на сцената“, во петок 24 јули – „Детето“, во сабота 25 јули – „Модерни времиња“ и во понеделник ќе биде прикажан филмот „Златна грозница“, соопшти Кинотека. Влезницата е сто денари. Чарлс Спенсер Чаплин (Charles Spencer Chaplin), или едноставно Чарли Чаплин (Лондон, 15 април 1889 –Корсие-сур-Вевеј, 25 декември 1977), е класик во светската кинематографија, а со него и почнува периодот што ние денес го нарекуваме класика. – Со безмалку 90 улоги на филм и 72 кредити како режисер, Чаплин е од оние автори кои компримираат вистински филмски универзум сам за себе: бил и сценарист, монтажер, продуцент, а повремено и компонирал или бирал музика за неговите филмови. И, како во случајот со сите класични филмски ликови, сè започнало едноставно: насмеј ја публиката, освој ги нивните срца, и биди на нивна страна, макар што заради тоа ќе ти замериестаблишментот, па и со децении ќе ти забрани влез во земјата (САД) каде што направил една од најголемите кариери во филмската индустрија, се наведува во соопштението на Кинотека. (МИА)

↧

Промоција на книгата „Песните се нивни незаборав“

July 16, 2020, 5:32 am

≫ Next: Во Прилеп ќе се отвори првата ликовна изложба од почетокот на пандемијата

≪ Previous: Циклус филмови со Чарли Чаплин под отворено небо во Кинотека

Во рамки на „Скопско лето“ денеска напладне ќе биде промовирана книгата „Песните се нивни незаборав“ – монографски труд посветен на 24 починати пејачи чии што песни и изведби имаат трајни вредности. Автори на делото се Кирил Тодевски – етномузиколог и повеќегодишен урредник на Редакцијата за народна музука на Македонското радио и Марија Велковска – уредник во Музичката програма на Македонското радио. Како што соопшти организаторот на „Скопско лето“ – Дирекцијата за култура и уметност на Скопје (ДУКС), книгата е посветена на песнопојците: Васил Хаџиманов, Никола Бадев, Александар Сариевски, Васка Илиева, Мирвет Беловска, Благој Петров-Караѓуле, Нада Макеларска, Гого Зафироски-Зафиро, Вања Лазарова-Димитровска, Блага Видец, Јонче Христовски, Добри Ставревски, Драгица Мавровска, Кирил Манчевски, Љупчо Дучевски, Мирко Митревски, Пепи Бафтировски, Есма Реџепова-Теодосиевска, Кирчо Поплазаров, Гоце Николовски, Петранка Костадиновска, Војо Стојановски, Јанко Узунов и Гоце Арнаудов. – Зад себе оставија непроценливо фолклорно богатство, со кои за навек го легитимираа македонскиот фолклорен израз. Со своите песни за себе испишаа незаборав, а на повиканите од сферата на Фолклористиката, односно Етномузикиологијата останува нивниот незаборав трајно да го забележат во своите научни и друг вид на прилози, соопшти ДУКС. Согласно со објавените протоколи, бројот на публиката ќе биде ограничен и задолжително ќе биде почитувањето на препорачаните мерки: носење заштитни маски, мерење телесна температура одржување на пропишаната физичка дистанца меѓу посетителите во гледалиштето и дезинфекција. (МИА)

↧

Во Прилеп ќе се отвори првата ликовна изложба од почетокот на пандемијата

July 16, 2020, 7:00 am

≫ Next: Настап на ВИС „Тркалезна маса“ на Скопско Лето со „Песни и звуци од чудната шума“

≪ Previous: Промоција на книгата „Песните се нивни незаборав“

Утревечер од 19:30 часот во ликовната галерија од прилепскиот Центар за култура „Марко Цепенков“ ќе биде отворена ликовната изложба на слики насловена како „Визии од детството“ од уметникот Горан Боев. Ова е прва ликовна изложба и прв културен настан од почетокот на пандемијата. Изложбата ќе биде отворена со запазување на сите препораки и заштини мерки од корона вирусот. Боев ќе се претстави со над 25 слики на кои се појавуваат различни фигури – мачка, куче, прозорец, цвеќе, дете. Според авторот, тоа е портрет на едно минато време, на неговото детство. Боев е уметник од Кавадарци. Завршил ДЛУ и магистерски студии во Скопје. Извеснов време работи како наставник по ликовно образование во основното и во средното образование. Се занимава и со црковен живопис и со иконографија. Досега има десеттина изложби во земјава и има учествувано на многу групни изложби во земјаваа и во странство. (МИА)

↧

Настап на ВИС „Тркалезна маса“ на Скопско Лето со „Песни и звуци од чудната шума“

July 16, 2020, 10:26 pm

≫ Next: Изложба „Ослободени“ на Христина Тарабунова во октомври во Скопје

≪ Previous: Во Прилеп ќе се отвори првата ликовна изложба од почетокот на пандемијата

Во рамки на манифестацијата Скопско лето вечер во Сули Ан во Скопје со почеток во 20:30 часот ќе настапи ВИС „Тркалезна маса” во соработка со фестивалот Денови на македонска музика 2020 и СОКОМ. Настапот е насловен „Песни и звуци од чудната шума”. „ВИС Тркалезна маса” е група настаната во рамките на четириесетмесечниот поетски маратон „Астални проекции”. Составот обединува писатели, музичари и уметници со различни уметнички искуства, сплотени околу меракот за импровизирана музика, настаната во спонтан дијалог со книжевноста и со омажи на значајни уметници и писатели (Дејвид Боуви, француски надреалисти, Блаже Конески, Лилјана Дирјан). Групата ја сочинуваат Ана Голејшка Џикова – вокал, Ѓоко Здравески – вокал, Владимир Лукаш – гитара, мелодика, Васко Марковски – мандолина, мандола, Деан Шкартов – хармоника, сајзер, Душан Кировски – гитара, Перо Сарџоски – кавал, џембе, Владимир Мартиновски – тамбури, удиралки, Ѓорѓе Јовановиќ – усна харфа, ефекти, Круме Стефановски – кахон и Тома Димовски – деф. Покрај многубројните концерти во рамки на „Астални”, ВИС Тркалезана маса настапувал на неколку манифестации, како денови Денови на европската култура, Радио Слободно Скопје, АртАреа. Проектот „Песни и звуци од чудната шума” е поттикнат од новиот бран на актуелната продукција на поезија за деца. Среде старата скопска чаршија, преку музички пејзажи публиката ќе се воведе во амбиентот на шумата, а ќе се читаат најнови песни за деца, најголемиот дел неодамна објавени во е-списанието „Чудна шума”.

↧

Изложба „Ослободени“ на Христина Тарабунова во октомври во Скопје

July 17, 2020, 1:51 am

≫ Next: Откупната награда на „Транзен“ за ликовниот уметник Владимир Илиевски

≪ Previous: Настап на ВИС „Тркалезна маса“ на Скопско Лето со „Песни и звуци од чудната шума“

Колективна изложба „Ослободени” на Христина Тарабунова ќе биде отворена на почетокот на октомври во просториите на Социјален клуб „Комитет“ во Скопје. – Одлучив да се посветам на таканаречениот проблем со критиките упатени кон уметноста т.е. начинот на изразување на еден уметник од страна на публика која нема доволно познавање во уметноста или оние негативни критики поради немањето желба да се разбере поинаквиот пристап. Преку еден краток разговор со пријателка, да ме поттикне да се пријавам на јавниот конкурс од страна на Министерството за култура, аплицирав со идеја за подобро утре и така, проектот наречен „Ослободени” беше одобрен за што сум многу горда и радосна, вели Тарабунова. За „Ослободени” таа посочува дека преку својот уметнички крик кон денешницата, заедно со уште седум креативци, уметници, сакаат да делуваат кон промена на светот и табуата. – Поентата е да има опомена кај заморениот граѓанин со што ќе истакнеме една нова визија и на тој начин ќе се обидеме да допреме до менталниот хендикеп на поединци кои воопшто не ни сакаат да ги погледнат поразличните дела, а со тоа и да ги ослободиме од комплексите на инфериорната средина. Токму на овој начин, сакаме да се избориме против помирливоста, преку слободата на говор и креативно изразување. Да постигнеме толеранција на мислата на другиот а со тој начин да овозможиме коегзистенција во современото македонско општество и естетски пресврт, истакнува Тарабунова. Поставката ќе и биде достапна на јавноста еден ден, откако официјално ќе биде отворена со уметнички перформанс од страна на еден од учесниците. Своите отворени погледи ќе ги претстават: Христина Тарабунова, Елена Кичевска, Милена Јаневска, Доротеј Нешовски, Крсто Анастас Глигорјадис, Висар Мехмеди, Снежана Мелник и Лидија Цаковиќ Мојсовска. (МИА)

↧

Откупната награда на „Транзен“ за ликовниот уметник Владимир Илиевски

July 17, 2020, 3:21 am

≫ Next: Премиерно два документарни филма во Кинотека по повод 57 години од скопскиот земјотрес

≪ Previous: Изложба „Ослободени“ на Христина Тарабунова во октомври во Скопје

Откупната награда на третата изложба „Несовршен простор“, на која темата е „Автопортретот во самоизолација“, ја доби ликовниот уметник Владимир Илиевски за делото „Автопортрет со був“, објавија од Здружененито за култура „Транзен“ од Струмица. Наградата, како и секоја година, се состои од симболична статуетка „Златен лист“ во чест на професорот Владимир Георгиевски и парична во износ од 30 илјади денари. Жирито и селектор на годинешната изложба е ликовниот уметник Урош Вељковиќ. -Најсилна приказна за мене, а и секако технички супериорно издржано дело, беше „Автопортретот со був“ на Владимир Илиевски. Делото привлекува да се гледа и анализира. Симболиката во делото на Илиевски е фасцинантна. Авторот држи був во рацете, кое е ноќно животно, симбол кој ми укажува на многу неспиени ноќи низ карантинските денови во изолација, и секако работа и посветеност врз себеси. Во тие тивки вечери, се случува вистинскиот и суштински момент кај уметникот, проследено со задоволства и фрустрации од завршените или незавршени дела, напиша Велковиќ. Изложбата ќе биде отворена на 22 јули во Струмица во клубот „Нагоре“. На неа ќе бидат претставени шеснаесет автопортрети од исто толку автори. Проектот е финансиски помогнат од Министерството за култура на Македонија во реализација на Здружението за култура „Транзен“ од Струмица. (МИА)

↧

Премиерно два документарни филма во Кинотека по повод 57 години од скопскиот земјотрес

July 22, 2020, 12:50 am

≫ Next: „Македоника литера“ ќе учествува на виртуелен саем на книга во Кина

≪ Previous: Откупната награда на „Транзен“ за ликовниот уметник Владимир Илиевски

По повод 57-годишнината од скопскиот земјотрес, Кинотеката на Македонија и Македонскиот центар за фотографија (МЦФ) премиерно ќе прикажат два документарни филма: „Првата светска војна, сеќавања” на Роберт Јанкулоски и „Преживеани спомени” на Роберт Јанкулоски и Моника Мотеска. Настанот, насловен „Сеќавања“, е закажан за 26 јули, со почеток во 21 часот. „Првата светска војна, сеќавања” е посветен на македонскиот фронт и на жртвите од Првата светска војна. Филмот е сниман во Македонија, Србија и Швајцарија, а финансиски е поддржан од амбасадата на Швајцарија во Република Северна Македонија. „Преживеани спомени”, пак, е дел од проектот „Фотографијата сведок или жртва” реализиран од страна на МЦФ во 2014 година во кој осум наши сограѓани, евоцираат спомени како го преживеале земјотресот од 1963 година и што е она што засекогаш ќе го паметат од тоа летно утро. Филмот е направен како дел од покомплексна уметничка инсталација и првпат се проектира надвор од поставката. На проекцијата на филмовите ќе се обрати амбасадорката на Швајцарија, Сибил Зутер Техада. Кинотека потсетува дека поради ситуацијата со КОВИД-19 воведе правила за безбедност согласно заштитните мерки, кои посетителите мора да ги почитуваат. Задолжителна е дезинфикација на рацете при влез во дворот и објектот, задолжително е носење маска или друга заштита преку устата и носот, задолжително е одржување дистанца додека се следи проекцијата, пушењето додека трае прикажувањето на филмовите е непожелно и забрането е внесување какви било пијалаци (алкохолни и безалкохолни).

↧

„Македоника литера“ ќе учествува на виртуелен саем на книга во Кина

July 23, 2020, 2:02 am

≫ Next: Селективно се делат пари во Агенцијата за филм: Актерите и режисерите го кренаа гласот против Тозија

≪ Previous: Премиерно два документарни филма во Кинотека по повод 57 години од скопскиот земјотрес

Издавачката куќа „Македоника литера“ ќе учествува на првиот меѓународен виртуелен саем на книгата кој од утре до 31 јули ќе се одржува во Кина. Глобалната кинеска медиумска корпорација Кинеска интернационална издавачка група (ЦИПГ) организира прв ваков меѓународен настан во светот во услови на пандемија. Саемот на книгата ќе биде претставен во 3Д-технологија за виртуелна реалност, прикажувајќи физичка присутност на книгите и создавајќи платформа за прикажување што опфаќа време и простор во глобалната издавачка индустрија за светот. Се очекува на овој начин да се воспостават нови канали на соработка во издаваштвото и да се поттикне читањето книги. – „Македоника литера“ учествува со свои видео и визуелни материјали кои се однесуваат на кинеските книги за деца објавени на македонски јазик во рамките на едицијата „Најдобрата кинеска литература за деца“, како и на севкупната дејност на „Македоника литера“, соопшти нашата издавачка куќа. Во рамките на глобалната медиумска корпорација Кинеска интернационална издавачка група (ЦИПГ), меѓу другото, работат и седум издавачи, чија дејност е насочена на меѓународна размена во издаваштвото. Меѓу седумте издавачи е „Делфин букс“, со кој соработува „Македоника литера“ и копродукциски објавија 13 тома од едицијата „Најдобрата кинеска литература за деца“, како дел од Одделот за кинески книги на македонски јазик што го формираа двата издавача.

Во рамките на соработка со „Делфин букс“ и ЦИПГ, „Македоника литера“ неодамна учествуваше и во меѓународната кампања „Читајте книги на Интернет“ и на Меѓународниот е-симпозиум за издавачки теми актуелни со новата ситуација на пандемијата, што го организираше ЦИПГ, а на кој учествуваше Нове Цветаноски, управител на „Македоника литера“. Редовниот 27. Меѓународен саем на книгата во Пекинг ќе се одржува од 26 до 30 август, на кој исто така, на штандовите на партнерите издавачи ќе бидат изложени и кинеските изданија на „Македоника литера“. Изданија на „Македоника литера“ на овој саем беа изложувани и во изминатите три години. Годинашниот меѓународен саем на книгата во Пекинг ќе се одржи под мотото „Живеј читајќи“, а една од поголемите манифестации на саемот ќе биде изложбата на книги за деца, на која ќе бидат претставени десет илјади наслови на 14 јазици, меѓу кои и на македонски.

↧

Селективно се делат пари во Агенцијата за филм: Актерите и режисерите го кренаа гласот против Тозија

July 23, 2020, 6:08 am

≫ Next: Кинотеката продолжува со прикажувањето филмови под отворено небо

≪ Previous: „Македоника литера“ ќе учествува на виртуелен саем на книга во Кина

Актери и режисери се кренаа против директорот на Агенцијата за филм, Горјан Тозија. Гневни се оти милиони евра завршуваат во џебовите на одредени филмски работници и тоа по неколку пати годишно. Која е комисијата што селектира, зошто Тозија работи против нас, прашува актерот и режисер Висар Вишка. -Се разбира дека главата на таа институција е првиот виновник. Неколку пати му е кажано дека треба да смени а не да продолжи по старо, но истото продолжува. Сега ја крие комисијата, кое што е тотално неразбирливо во една државна институција да криеш комисија, демек ја чува од некакви влијанија или незнам. Ако некој неможе да ги сноси секакви надворешни влијанијата од надвор тој не треба да биде во една комисија или да биде глава на една институција. Секој со чист образ треба да стои поради својата одлука и да може да ја одбрани својата одлука. И тој намерно го прави,бидејќи секогаш се крие позади некаква комисија кој никој не ја знае, а уствари одлуките не се ни на комисијата не ни знаеме кој одлучува, а ние интимно знаеме кој одлучува и кој ќе добие пари уште пред да се објават резултатите, вели за Алфа, Висар Вишка. Вишка не гледа спас во надлежните, инспекторат и од министерството, оти сите се поставени од една иста Влада. -Тој е одбран од Влада на Република Македонија. Тој директно ги координира сите кои се таму одбрани од Влада. Многу е смешно што кога продуцентите ќе наидат на проблем, ни се случи неколку пати, одат пред Министерството за култура кое нема никакви ингеренции да ни помогне, бидејќи ниту ја избира комисијата ниту го директорот. Тоа е директно од Влада. Владата треба да превземе нешто, тврди Висар Вишар. Жртва не се авторите, туку делата, пишува и режисерот Антонио Митриќески. Чувството е дека македонскиот филм е заробен во некој маѓепсан затворен круг и дека постојано едни исти автори се фаворизираат, а некои други се маргинализираат. Тозија до сега молчи во врска со распределбата на проектите.

↧

Кинотеката продолжува со прикажувањето филмови под отворено небо

July 24, 2020, 4:04 am

≫ Next: Во Битола отворена изложба „1000 години Бигорски манастир“

≪ Previous: Селективно се делат пари во Агенцијата за филм: Актерите и режисерите го кренаа гласот против Тозија

Кинотеката соопшти дека продолжува со прикажувањето филмови во летното кино под отворено небо. По исклучителниот циклус филмови со Чарли Чаплин, крајот на јули и добар дел од август се резервирани за мошне интересни и интригантни наслови, посочија од Кинотеката. Во рамки на програмата ќе бидат прикажани: на 30 јули британскиот филм „Убиството на светиот елен“ во режија на Јоргос Лантимос, на 31 јули филмот „Студена војна“ на режисерот Павел Павликовски, на 1, 8 и 17 август јужнокорејскиот филм „Паразит“ во режија на Бонг Џун Хо, на 5 август македонскиот филм „Мирно лето“ во режија на Димитрие Османли, на 6 август швајцарскиот филм „Каде припаѓаме“ во режија на Жаклин Цинд, на 7 август швајцарскиот филм „Хронофобија“ во режија на Франческо Рици, на 10 август италијанскиот филм „Тие“ во режија на Паоло Сорентино, на 11 август документарниот филм „Битлси: Осум дена во неделата“ во режија на Рон Хауард, на 12 август документарниот филм „Павароти“ во режија на Рон Хауард. На 13 август ќе биде прикажан филмот „Климакс“ во режија на Гаспар Ное, на 14 август филмот „Златната ракавица“ во режија на Фатих Акин, на 15 август филмот „Офицер и шпион“ во режија на Роман Полански, и на 18 август филмот „Скитникот од плажата“ во режија на Хармони Корин. Почетокот на прикажувањето на филмовите е во 21 часот.

↧

Во Битола отворена изложба „1000 години Бигорски манастир“

July 26, 2020, 10:09 pm

≫ Next: Семинар за традиционална музика и игра во Битола

≪ Previous: Кинотеката продолжува со прикажувањето филмови под отворено небо

Изложба „1000 години Бигорски манастир“ во која се преставени 17 икони-копии, две фрески и една плаштеница од Бигорски манастир синоќа беше отворена.во Битола во рамки на Републичкиот фестивал на народни игри и песни „Илинденски денови“. Изложбата е придонес на НУ Центар за култура и јубилејните 50 години на фестивалот „Илинденски денови“ кон јубилејот на Бигорскиот манастир основан во 1020 година, посочи Маја Андоновска Илијевски, директор на таа национална установа во Битола. -Бигорскиот манастир многу пати бил рушен и пален, а е возобновен во 1995 година со доаѓањето на отец Партениј од Света Гора. Како што е познато отец Партениј е по потекло од Битола, а таму во манастирот живеат и други наши битолчани со чиј благослов ја отворам оваа изложба, истакна Андоновска Илијевски. Изложбата „1000 години Бигорски манастир“ ја подготвија и организираат членови на Ансамбл „Македонија“ од Скопје, во рамки на проект поддржан од Министерство за култура и Бигорски манастир, истакна професорот д-р Владимир Јаневски, раководител на ансамблот „Македонија“. -Ансамбл „Македонија“ овој проект го реализира со презентација на икони од Бигорски манастир и паралелна концертна изведба на мијачките обреди, световни ора и песни кои биле и ден денес се присутни во Бигорскиот манастир, и тој крај каде се наоѓа манастирот. Оваа изложба ќе патува и ќе биде претставена низ цела држава, низ сите градски центри за култура и музеи, а очекуваме за кратко време изложбата да биде претставена и во странство, бидејќи често концертите на Ансамбл „Македонија“ се придружени со тематски изложби, истакна Јаневски. Битолската публика во културниот центар „Магаза“ може да ги погледне најпознатите икони од олтарот во Бигорскиот манастир, икона стара 1000 години која сведочи и посочува на почетоците на манастирот кои датираат од 1020 година, потоа икони од 16 век, како и икони од 19 век.

↧